去旅行， 總有一站係超市。

剛剛去曼谷，死黨1號2號由出發第一日已經係咁話要去邊間邊間超市掃貨，仲要表現出一個一定要去既堅定神情。無論自己去旅行定一大班人去旅行， 明明旅遊書唔會介紹超市呢個地方，但我地總係好自動自覺去搵超市係邊。



超市呢家野，識得用真係好好用。去旅行行景點悶悶地人又多出街又熱，想睇下當地人平時點生活，從日用品開始入手亦係一種學習。就算同一枝XXX洗頭水，人地既款都可能唔同D，同一隻牌子既百力滋又可能多D味俾你揀。去美國既超市仲開心，8年前第一次去美國住，就算揸車都要行老遠既超大超寬闊既WXXMART，令我見識到食零食平過食麵包既生活指數 (唔知而家仲係唔係呢...) 所以，唔好以為行超市只係為左去買枝水咁簡單，其實大把野學，尤其是日本個D奇怪產品，真係見都未見過，千奇百趣。

當然，醉翁之意不單在此。死黨1/2/3號都係一心一意去掃平零食。既然超市係做當地人生意，咁旅客去買都起碼唔駛驚俾手信店鋸到一頸血。而且老實講，做細公司就話姐，一做大公司郁D都識50幾60人，個個都話要手信，分分鍾仲貴過張機票。喂，冇理由買手信俾人都買到自己都唔夠錢洗姐？而且超市D零食都幾高質素。不過令我佩服既係，好幾次旅程上身邊既朋友買零食都買到爆哂gip。